Detajet e Easy, dashuria nuk është gjithmonë e lehtë
Duke u larguar e vetme nga një festë, Zhaklina sulmohet nga një shok vëllazërie i ish-it të saj. E shpëtuar nga një i huaj që duket se gjendet në vendin e duhur e në çastin e duhur, ajo s'do gjë tjetër veçse ta harrojë atë sulm dhe atë natë, por, Lukasi, shpëtimtari i saj, është në të njëjtën klasë ekonomie me të. Ai skicon në një bllok dhe ia ngul sytë vazhdimisht. Shoqet e saj mendojnë se ai është kandidati i përkryer për ta bërë Zhaklinën të harrojë ish të dashurin e saj. Ndërkohë, sulmuesi i saj vazhdon ta përndjekë dhe Zhaklinës do t'i duhet shumë kurajë dhe vetëbesim për të ngritur ballin dhe zërin kundrejt një padrejtësie që i bëhet prej mijëra vitesh shumë grave nëpër botë. "Easy. Dashuria nuk është gjithmonë e lehtë..." është një roman romantik për të rinj dhe trajton një temë të ndjeshme e bashkëkohore, atë të dhunës kundër grave. Papritur unë u inatosa keq. E kisha inatin me Kenedin sepse më kishte thyer zemrën dy javë më parë e nuk ishte me mua sonte që të më shoqëronte pa telashe drejt makinës sime. E kisha inatin me Erinën sepse më kishte bindur të vija në këtë festë idiote, si dhe me veten ngaqë kisha pranuar. Isha e tërbuar me qelbësirën e trullosur që jargavitej i gjakosur në trotuar pak metra larg meje dhe shfryja ndaj të panjohurit që po më mbante peng çelësat teksa më quante budallaqe dhe të pavëmendshme. “E paskam unë fajin që ai më sulmoi? – e kisha fytin të ashpër, por e lashë dhimbjen mënjanë. – E paskam unë fajin që nuk mund të eci nga një shtëpi te makina pa u përdhunuar nga njëri për jush?” – ia përmenda atij atë fjalë që t’i tregoja se mund ta përballoja situatën. “Njëri prej nesh? Po më përfshin në të njëjtën kategori me atë legenin? – ai tregoi me gisht nga Baku, por nuk m’i ndau sytë për asnjë çast. – Unë nuk kam asgjë të ngjashme me të.”